ليه كده؟!
ليه سمحنا إننا نوصل لكده؟!
الناس النهارده كانوا بيقولولي في المطار :
"حمدلله ع السلامة نورتي مصر."
ملقتش نفسي قادرة أقول كالعادة:
"#مصر منورة بأهلها."
!!! 😔😔
هو مبقاش فيه نور فيكي يا مصر؟!
مين اللي سرق نورك وخلاكي بقيتي كده؟!
في عُرف مين يتقتل راهب مسالم ميعرفش يؤذي حتى فراشة؟!
ليه كل يوم طعنة جديدة في قلبي وغيمة حزن في عيوني؟!
ليه مش قادرين نرجع زي زمان لما كنّا بلد الأمن والأمان وكلنا بنحب بعض منعرفش مين فينا مسيحي ومين مسلم وحتى مين يهودي؟!
مين اللي علّم المجرم ده يشيل سكينة ويقتل حد ميعرفوش؛ لمجرد أنه رجل دين مسيحي معملوش أي حاجة؟!
لو كان اتعلَّم انه لو كان راح يكلمه قبل ما يطعنه، كان الراهب ده هايبتسم في وشه ويمسح على راسه ويدعيله ان ربنا يكرمه ويصلح حاله ويبارك حياته ويقدّره يعبد ربه حسب عقيدته كمسلم!
ليه بدل ما ياخد دعوة طيبة ويكمل حياته في سلام وإيمان يتحول في لحظة إلى قاتل خسر دنياه وآخرته، بعد ما أنهى حياة نفس مسالمة واهبة حياتها لله متعرفش تؤذي ولا تكره؟!
ليه كده؟!
😔😔😔
سامحنا يا أبونا دمك هو دمنا كلنا.
سامحونا يا أقباط؛ لسه فيه منا ناس محتاجين علام وتحضر وطيبة وسمو.
سامحينا يا مصر ؛ عشان معرفناش نصونك ونحترم تاريخك وحضارتك وعراقتك ونقدّر اسمك الغالي المذكور في الإنجيل والقرآن!
وسامحنا يا رب عشان مش قادرين نوصل لجوهر الإيمان بك.
يا رب رجّع مصر زي ما كانت من فضلك وكرمك.
#فاطمة_ناعوت
