صفحة أبونا أغناطيوس الأنبا بيشوي

صفحة المتحدث الرسمي بإسم الكنيسة القبطية الارثوذكسية

طُوبَى للمتعطف علي ٱلْمِسْكِينِ. فِي يَوْمِ ٱلشَّرِّ يُنَجِّيهِ ٱلرَّبُّ.” ‮‮اَلْمَزَامِيرُ‬ ‭41:1‬ ‭‬‬

من القصص اللي لمست فيها أد إيه ربنا هو اللي
 بيعول المساكين كان موقف حصل مع عم بشرى +++

تعالوا بقى أحكيلكوا مين هو عم بشرى....
لما خلصت السيراميك في الشقة عندي إتبقى حوالي ٣ متر رمل جوة الشقة.... كانوا عاملين ذي الجبل.... واكلين نص الصالة بالظبط.... والنقاش قالي مش هاقدر أشتغل والرمل دة موجود.... ومستحيل طبعاً أجيب ونش تاني علشان يشيلهم.... بقيت أسأل الفواعلية تاخدوا كام وتشيلوا الرمل فكل واحد بقى يقولي سعر شكل.... اللي يقولي ..٥ واللي يقولي ..٤ وكل واحد بقى يتنطط عليا.... وأنا بقى إتغاشمت وقولت مش هادفع الرقم دة مهما حصل.... ثيؤفانيا خطيبتي بتزور فقراء كتير... فجات قالتلي فيه واحد عاوز يشتغل اي شغلانة وخلاص إسمه عم بشرى.... فكلمتهولي فقالها هايشيل الرمل ب .٨ جنية.... قولتلها مية مية... هاتيهولي.... لقيت راجل كبير في السن وعنده تلعثم في الكلام ونص كلامه مش فاهمه.... كل اللي فهمته انه عاوز يشتغل وخلاص لإن معهوش فلوس.... انا قولت ياربي الراجل جاي لوحده.... وراجل كبير.... هايعمل ايه دة....!!!!
الراجل جه معايا وبدأ يشيل في الرمل.... شويتين ولقيته بدأ يتعب.... وفعلاً صعب عليا.... روحت قولت يا واد يا بيشوي قوم ساعده حرام.... دة كفاية إنه هايشيل جبل ب .٨ جنية.... فبقيت أعبي معاه الرمل وأشيلها وأطلع بيها فوق السطح.... فلقيته بصلي وفهمت منه بالعافية انه بيقولي حقك عليا يابني اني خليتك تشيل.... دة انت شكلك إبن ناس.... الراجل صعب عليا... واللي صعب عليا اكتر إن لأجل الحظ النحس ماكنش في جيبي غير ..١ جنية بس.... يعني حتى مش هاقدر أزودله أكتر من
 .٢جنية.... قولت انا هاساعده وأشيل معاه وخلاص....
بعد يوم طويل اتهديت أنا وهو فيه قدرنا نرفع ٣ متر رمل.... روحت قولتله ياعم بشرى انت راجل طيب.... انا اتفقت معاك على .٨ جنية لأ خد
..١جنية.... وكأني ببقشش عليه.... مع إنه يستحق أضعاف الرقم على التعب دة.... رفعت عيني لربنا وقولتله حقك عليا يارب.... صدقني يارب مفيش في جيبي غير ال ..١ جنية دي لإني نسيت الفلوس.... المهم قولت لعم بشرى أنا هاديك حاجة حلوة... فكان عندي كام بلوڤر قديم على كام قميص.... قولتله خدهم اكويهم وإلبسهم.... الراجل كان طاير بالهدوم القديمة دي.... وكان فرحان بال .٢جنية الزيادة.... وهو مايعرفش اني قاعد اقول جوايا حقك عليا يارب مقدرتش اساعدك.... الراجل لبس قميص منهم علشان يروح بيه.... وأثناء ماكان بيقلب فيه لقى جواه .٢٥ جنية.... ومن أمانته لقيته بيقولي أنا لقيت دول.... قولتله ياعم بشرى دة المسيح بعتهوملك.... خدهم دول بتوعك وحقك.... بصيت للسما وقولت ياااااااه يارب.... انت حاسس بتعب الراجل ونظرت لصلاتي وماروحتنيش زعلان و روحت عم بشرى وهو معاه قوت يومه وبزيادة.....
أوعى في يوم تبخل على فقير.... لإنك يوم مابتدي فإنت بتدي المسيح.... ويوم مابتبخل فإنت بتبخل على المسيح....