صفحة أبونا أغناطيوس الأنبا بيشوي

صفحة المتحدث الرسمي بإسم الكنيسة القبطية الارثوذكسية

تداريب ايام الخماسين ..

** تدريب1: اصح بدرى مخصوص 1/4 او 1/2 ساعه تقول " صباح الخير يارب " ( يعنى صلاه باكر او تسبحه باكر .. اصحاحين او هوس من الهوسات ) يعنى بزمه شويه . خبر القيامه ارتبط بالفجر وفيه تعليم عند الاباء الاوءل .. ان الراهب لازم يصحى يدخل الكنيسه قبل ما الشمس تطلع والا اليوم راح منه .. التعليم ده موجود فى سفر الحكمه بايه تقول "" يصح الانسان يسبق الشمس لتسبيحك "" ان كانت الشمس صاحيه تسبح يبقى المفروض البنى ادم بالاولى يسبقها .

** تدريب 2: انك ماتسمحش لنفسك تزعل .. اول ما حاجه تيجى تضايقك قول فى بالك .. خييرررر .. اخرستوس انستي .. تحايل روحك يعنى .. النور اتقطع .. اللى حواليك مغلسين .. مايصحش تزعل فى الخماسين المسيح قام ومش هايموت تانى . راقبوا نفسكم والحمد لله النكد كتير . خلى بالك فى الخماسين الشيطان بيتفنن يضيع فرحتك ،يغيظك ،ويضايقك علشان يقول للرب يسوع "" شوف اللى انت عملته انا باضيعه "

** تدريب 3: انك ماتبطلش تقول اشكرك يارب .. اعتبر القيامه وعد بابديتك وعدك بالسما فرد فعلك .. اشكرك يارب .

** تدريب 4 : هاتستغربوا لما اقولكم "" ماتكلوش كتير "" الخماسين مش تصريح بالكل الكتير و كلكم جربتوا الاكل الكتير يخليك مش مركز فى الانجيل ولا فى الصلاه .. احنا فرحانين بس مش بالاكل .. ماينفعش بعد كل الايام الروحانيه نقلبها جسدانيه . كلوا اللى تحبوه .. لكن مش بكميات كبيره .. صدقونى الاكل الكتير مضر بالصحه .. كل براحتك اقصد فى الانواع لكن مش بكميات .

** تدريب 5: فرح اللى حواليك ، اذا كان المسيح فرحنا . شوف ايه اللى يفرح اللى حواليك واعمله .. كلمه طيبه ، ترحيب ، خدمه ، مشاركه ، زياره ، مكالمه تليفون ، عطاء بسخاء . انت مديون لربنا هو فرحك فانت مطالب تفرح اللى حواليك .

** تدريب 6: حاولوا تتناولوا كتير .. حلاوه الفرح نش هاتعرف تدوقها بعيد عن المسيح .. والقداسات كلها بدرى وكل يوم .

** تدريب 7: تقول مراحمك يا الهى من تسبحه باكر .

** تدريب 8: زودوا المزامير ، مش يعنى اننا خلصنا الصيام يبقى خلصنا كل حاجه روحيه ، المزامير والانجيل فى راى يعوضوا الصوم والميطانيات ، علشان الجرعه الروحيه ماتقلش . احنا فى الاخر ناس روحيين مش جسدانيين .