ليديا وماجي
الله يحب أولاده إلي المنتهى، حنين جدا في طريقته وهو بيتعامل مع كل واحد علي حدة، ومعانا كلنا بصفة مجمعة، يظهر ده جدا في موقفين عشتهم قريب شبه بعض شوية..

الموقف الأول :
ليديا أكرم الفرس الأبيض ❤
ليديا راحت السما بعد حوالي ٩ أيام قضتهم في غيبوبة، من المفترض إن هي في السما من قبل ما ربنا يرتب ويسمح إنها تفضل ٩ أيام على أجهزة من غير تحسن!

الموقف الثاني :
ماجي مؤمن ملاك البطرسية ❤
ماجي راحت السما بعد حوالي ٩ أيام في حالة سيئة جدا من وقت ما دخلت المستشفي، الحالة ماخدتش خطوة واحدة للأحسن أو للأسوأ، ده معناه إنه كأن ربنا خدها ليه بحالتها بعد التفجير، ومع ذلك رتب وسمح بالفترة دي تعدي من غير تحسن!
لكن الوقت ده كان شغل ربنا وحنانه مع كل حد!

•مع ليديا وماجي..
ربنا حب يوريهم وهما علي الأرض جزء من رسالتهم اللي كانت بتنادي دايمًا بإسمه.. كل واحد بطريقته في مجتمعه، الناس عرفتهم وقامت بإسمهم إجتماعات صلاة كتير جدا، وبإسمهم إترفعت قلوب لربنا كانت بعيدة عنه..

•مع أهل ليديا وماجي..
أظن إن ربنا كان في الوقت ده بيمهدهم وبيحط في قلوبهم العزاء اللي يقدر يسندهم.. وفعلا..
ماما ليديا تقول : ليديا راحت لملك الملوك اللي سندها واللي خلق الروح دي.. ماهي صورة أبوها وهو حبيبها ورفيق دربها ومزين العروس واللي إبتدى الرحله معاها وكملها..
وماما ماجي تقول : إحنا بنربي علشان ندّخل السما وماجي راحت السما..
والإثنين طلبوا إن الصلاة تكون بالأبيض لأنها زفة للسما..

•معانا إحنا بقى..
ربنا الوقت ده بيكون حنين جدا!
بينزل لنا "حرفيًا" يأخدنا كده من إيدينا ويبتدي يفهمنا جزء من الحب الطاهر المقدس.
لما تلاقي الناس في فترة الـ ٩ أيام دول حبّوا ليديا وماجي جدا! حبّوهم حب نقي إرتباطه الوحيد بربنا وبالصلاة ليهم! دون إنتظار لأي رد منهم..
حب طاهر جدا غريب عن قلوبنا البشرية اللي عايشة هنا في العالم!
يعني إيه نحب أشخاص من صورهم ونتمسك بيهم ونبكي عشانهم في وقت ونصلي لهم في أصدق لحظات صلاتنا، واحنا ممكن نكون معرفناهمش غير في الوقت الصغير ده من شوية صور!!!
دايمًا الحب ده لو ركزنا معاه وكبرناه في قلوبنا وحياتنا هايبقي الأساس والركيزة للحب الإلهي الأعظم..

شكرًا إن صلينا لكم قبل ما تسافروا.. دلوقت إنتم اللي هاتصلوا لنا من السما لحد ما ربنا يسمح إننا نتجمع كلنا..

"يَا لَعُمْقِ غِنَى اللهِ وَحِكْمَتِهِ وَعِلْمِهِ! مَا أَبْعَدَ أَحْكَامَهُ عَنِ الْفَحْصِ وَطُرُقَهُ عَنِ اﻹسْتِقْصَاءِ!" (رو١١ : ٣٣)
"تَذَكَّرْتُ أَحْكَامَكَ مُنْذُ الدَّهْرِ يَا رَبُّ، فَتَعَزَّيْتُ." (مز١١٩ : ٥٢ )

#الله_صالح.
#ليديا_أكرم.
#ماجي_مؤمن.