قرينا عن مذابح جماعية لاجدادنا و الدم يوصل للركب... بس متخيلناش نشوفها ف حادثة القديسين بعنينا !!!

قرينا عن مارجرجس و الست دميانة وازاى انحنوا براسهم للسياف بكل سلام .. لكن متخيلناش اننا نشوف نفس المنظر بالظبط في شهداء ليبيا!!

قرينا كتير عن هجمات البربر ع الكنايس زمان وازاى ابونا كان بيجرى بالذبيحة وينهى القداس ويأكل الجسد ويشرب الدم ف لحظات ... لكن متخيلناش أننا نشوفه بعنينا ف البطرسية!!

قرينا عن الست رفقة و يوليطة..و ازاي ولادهم بيتدبحوا قدامهم و أد إيه الموضوع مؤلم و مع ذلك ما أنكروش المسيح..لكن ماتخيلناش نعيش نفس الاحساس واحنا شايفين مدام نهلة وهي بتودع بناتها الاتنين!!

قرينا عن الشماس اسطفانوس و الطفل كرياكوس و الطفل أبانوب و أد ايه كانوا بيصلوا للي بيعذبوهم و بيسامحوهم من قلبهم...بس مافهمناش دا غير لما شوفنا سوسنة و سينتيا في المستشفي بيصلوا للي فجروهم و سببولهم عاهات
***

قارينا كتير ف تاريخ كنيستنا....و اللى قاريناه عشناه وشوفناه بعنينا!!
عرفنا واتاكدنا أن أجدادنا صادقين وان السنكسار مش قصص خيالية..
عرفنا إن ايمانا حقيقي...و إن الابطال اللي بنقف مبهورين قدام قوة ايمانهم وشجعاتهم...لسة كنيستنا قادرة تخلف زيهم تاني

شكرا يوليوس العظيم...عشان مافوتش علينا أحداث زمان
شكرا لكل ارهابي بأمانة...عشان خلتنا نعيش عظمة زمان

هتفضل السما مفتوحة وهيفضل السنكسار مفتوح..
هتفضل الكنيسة ولادة...و الارهاب هيفضل يبعتنا ورا بعض :)

#كنيستي_ما_أروعك
#مروية_بدم_ولادك
#بنعيش_التاريخ